Sirijskim pobunjenicima oružje iz SFRJ?

Sirijske pobunjenike u skladištima u Turskoj čeka isporuka oružja iz bivše Jugoslavije, a njihovo dodatno naoružavanje moglo bi da preokrene odnos snaga u toj zemlji, ocijenio je dopisnik britanskog lista Telegraf u svom autorskom tekstu.

"Početkom godine, pobunjenici su dobili seriju isporuka oružja iz bivše Jugoslavije, uključujući protiv-tenkovske rakete", piše novinar britanskog lista i dodaje da, kako navode zvaničnici, takvog oružja ima još mnogo, da su ga platile zemlje Persijskog zaliva, i da se nalazi u skladištima u Turskoj, čekajući na znak SAD-a da bude isporučeno pobunjenicima.  

Novinar Telegrafa, opisujući razvoj situacije u Siriji, zaključuje i da bi priliv dodatnog oružja mogao da preokrene ravnotežu, s obzirom na to da "pobunjenici nisu u tako beznadežnom položaju". On, takođe smatra da američki predsjednik Barak Obama rukovodi ratom u Siriji "iz sijenke" i da zbog toga "ne vidi kuda ide".  

"Neke ratove birate sami, a neki ratovi biraju vas. Ima li bolje ilustracije ove stare mudrosti od laganog uvlačenja predsjednika Obame u rat u Siriji?", ocijenio je dopisnik Telegrafa.  

"Čovjek koji se u predizbornoj kampanji protivio ratu u Iraku, čiji je cilj bio okončanje rata u Avganistanu, koji je sve svoje savjetnike, jednog po jednog, zaustavljao kada su tražili akciju protiv sirijskog predsjednika Bašara al Asada, bio je prinuđen na situaciju iz koje nema izlaza", dodaje on.  

Vijesti da će SAD snabjdevati oružjem sirijske pobunjenike koji se bore protiv režima dolaze iz anonimnih izvora, u njima se pominju samo vojni transport i oprema za komunikaciju. Uvođenje zone zabrane letenja je moguće, ali samo moguće, što takođe navode anonimni izvori - piše dopisnik londonskog lista. Novinar Telegrafa zaključuje i da "u svakom slučaju, Amerika sada ne može da se izvuče".  

Od opstanka pobunjenika, kako navodi, zavisi njena "reputacija kao 'imperije' i ona mora da učini sve da to sačuva".  

"Ovdje se postavlja pitanje koliko su politički saveznici Sirije - Iran i Rusija, spremni da se zalažu za Asadovu pobjedu. Za Obamu opasnost predstavlja i to što bi Iran i Rusija bili srećni da vide kako Amerika tone do guše, kako se bruka zbog sve bližeg savezništva s džihadistima, koje navodno smatra neprijateljima. Takvo je asimetrično ratovanje", zaključuje on.

Pratite nas na našoj Facebook i Instagram stranici i X nalogu.