Rojters: Najmanje 60 ljudi ubijeno u napadu Boko Harama u Nigeriji

ABUDžA – Najmanje 60 ljudi, uključujući sedmoro vojnika, ubijeno je u napadu militanata Boko Harama na selo u nigerijskoj državi Borno, u koje su se ljudi vratili tek prošlog mjeseca nakon što su godinama bili raseljeni, rekli su danas mještani za Rojters.

Nigerijska vojska navodi da je u posljednjih mjeseci pojačala operacije protiv pobunjenika u državi Borno kako bi pokušala da obuzda militante Boko Harama i njene otcijepljene grupe, kao što je Islamska država Zapadna Afrika (ISWAP).

Analitičari i stanovnici kažu da operacije nisu uspjele da zaustave napade, a nasiljem je pogođena i sjeverozapadna Nigerija.

Napad na Darul Džamal, u lokalnoj samoupravi Bama, dogodio se u petak, kada su naoružani borci upali u zajednicu, pucajući nasumično i paleći kuće.

Babagana Mala, mještanin koji je pobjegao sa vojnicima u grad Bama, udaljen oko 46 km, rekao je da je 63 osobe ubijeno, uključujući sedam vojnika i nekoliko ljudi koji su se vratili iz kampa za interno raseljena lica u Bami.

Stanovnik Darul Džamala, koji je želio da ostane anoniman, rekao je da je do jutros pronađeno 70 tijela, a da se još stanovnika i dalje vodi kao nestalo.

„Išli su od kuće do kuće, ubijajući muškarce i ostavljajući žene. Skoro svako domaćinstvo je pogođeno“, rekao je on.

Guverner Babagana Zulum posjetio je danas ovo područje kako bi procjenio štetu i utješio preživjele, potvrdio je izvor za Rojters.

Pratite nas na našoj Facebook i Instagram stranici i X nalogu.