Njemačka i Češka pod vodom, Dunav prijeti Beču FOTO

Berlin - Njemačka se i dalje bori s poplavama, a posebno teška situacija je u Bavarskoj i Saksoniji, gdje u mnogim mjestima važi najviši stepen opasnosti, prenosi Tanjug.

Osim muka i štete koje sa sobom nose nabujale rijeke, u pojedinim dijelovima zemlje došlo je i do problema u saobraćaju, posebno u željezničkom.

Rijeke, koje nemilosrdno nose sve pred sobom, preplavljeni putevi, voda u kućama, podrumima i starim, gradskim jezgrima, probijene brane, džakovi s pijeskom na obalama, ljudi u čamcima i hiljade evakuisanih na sigurna mjesta - slike su koje ovih dana stižu iz Bavarske, Saksonije, Tiringije, Baden - Virtemberga, Saksonije -Anhalt i drugih dijelova Njemačke, zemlje bogate vodama i rijekama, a time i posebno izložene opasnostima od poplava.

Njemački kancelar Angela Merkel je obećala pomoć poplavljenim regionima i stanovništu, a na terenu, prije svega u gradu Rozenhajm i bavarskom Berhtesgadenu su i vojnici Bundesvera, koji pomažu stanovništu.

Njemačka je pod poplavama, a Merkelova 100 dana pred izbore - tako da mediji podsjećaju na situaciju iz 2002. godine, kada je bivši njemački kancelar Gerhard Šreder, koga je kamera ''voljela'' i koji je bio poznat po tome što je umio da pokaže bliskost sa narodom, u sličnim poplavama bolje ''plivao'' od svog tadašnjeg ''izazivača'', konzervativnog Bavarca Edmunda Štojbera, što je bio važan faktor za Šrederovu pobjedu.

Da li će i Merkelovoj, racionalnom fizičaru i njenom ''izazivaču'' socijaldemokrati Peru Štajnbriku, koga su mediji napadali zbog visokih honorara i koji u anketama stoji prilično loše, ove poplave donijeti ili oduzeti političke poene, tema je o kojoj se može diskutovati.

U Njemačkoj je posebno teška situacija u Rozenhajmu i Pasau, gradu kroz koji protiču tri rijeke, Dunav, In i Ilc i gdje je voda već stigla do starog, istorijskog gradskog jezgra.

U Pasau se očekuje istorijski rast nivoa Dunava do 12,55 metara visine, znatno gore nego u katastrofalnim poplavama 2002. godine, ukazuju meteorolozi, dok je bavarska vlada formirala krizni štab za pomoć nastradalim u ovoj prirodnoj katastrofi.

U Saksoniji je posebno pogođen mali grad Grima, a predsjednik vlade te pokrajine, Stanislav Tilić, prvi Lužički Srbin koji se u politici vinuo tako visoko, otkazao je svoje inostrane posjete i pokušava sa svojim timom da pomogne u borbi sa vodom.

Njemački meteorolozi za danas najavljuju ponovo padavine, a mediji sa terena javljaju da je u nekim kućama u kriznim regionima isključena struja iz bezbjedonosnih razloga.

Danas se u gradu Pasau očekuje dolazak 150 vojnika Bundesvera, a u pokrajini se, prema riječima pokrajinskog ministra unutrašnjih poslova Joahima Hermana ima oko 15.000 ljudi, koji dobrovoljno pomažu.

U kriznim mjestima ove pokrajine škole će danas biti, uglavnom, zatvorene, javljaju mediji.

U regionu grada Lajpciga, takođe, je teška situacija, a eksperti polaze od toga da će nivo vode premašiti onaj iz 2002. godine.

U gradu Ajlenburgu, na reci Muldi koja je lijeva pritoka nabujale Labe, evakuisano je oko 7.000 ljudi, u Grimi oko 2 500, a slična situacija je i u drugim okolnim mjestima, gdje su ljudi smešteni, uglavnom, u sportske hale i druga mjesta.

Četiri osobe stradale u Češkoj

U poplavama koje su od vikenda zahvatile Češku na Vltavi i Labi i njihovim pritokama stradalo je četvoro ljudi, a četvorica Čeha koji su splavarili po nabujalim rijekama se vode kao nestali.

Sinoć je otkriveno tijelo 82-godišnjeg Čeha u Mokšanima u Centralnoj Češkoj u koritu potoka koji se pretvorio u bujicu. Ranije su nađeni žena i muškarac u vikendici kraj Praga koja se srušila od posljedica poplava.

Istog dana otkriveno je i beživotno tijelo muškarca u rijeci Upi na sjeveru zemlje.

Prag sa strepnjom iščekuje poplavni talas sa juga, pošto su u sjećanju poplave iz 2002. godine, kada je Vltava poplavila istorijski centar grada, prodrla u metro, neke četvrti na obali pretvorila u kanale i uništila donji dio Zoološkog vrta.

Na kritičnim mjestima su uz pomoć 300 vojnika postavljene barijere protiv poplava, u centru ne saobraća metro, niti neki tramvaji, zatvorena su obdaništa, osnovne i srednje škole na teritoriji cijelog grada, a Filozofski fakultet otkazao je prijemne ispite.

Poplave još ne iziskuju masovne evakuacije kao prije 11 godina, ali juče i danas se u Pragu i širom Češke, za sada dobrovoljno, evakuišu ljudi iz najugroženijih mjesta.

Do sada je 2.965 ljudi u Češkoj moralo da napusti domove, od kojih 200 u spasilačkima akcijama.

Zoološki vrt je poplave dočekao spreman i tokom noći evakuisane su sve životinje iz donjeg dijela, a miljenici Pražana, gorile, su premještene u specijalni toranj, izgrađen u paviljonu upravo za slučaj poplava.

Slonovi i nilski konji, čija je evakuacija najkomplikovanija, su još od proljeća u novom paviljonu u gornjem dijelu vrta, koji Vltava ne ugrožava.

- Stanje je stabilizovano. Barijere su postavljene za protok veći za 300 kubnih metara nego što je sada. Najgore smo izgleda savladali - kazao je danas vršilac dužnosti gradonačelnika Praga Tomaš Hudeček.

Poplavni talas sa strepnjom očekuju na Labi od ušća gdje se uliva Vltava do sjevera na granici sa Njemačkom zato što će Labom proći poplavni talas iz cijelog sliva.

U Usti nad Labom evakuisana je zgrada Okružnog suda, a u prekidu je i saobraćaj na prometnom autoputu iz Praga ka Dečinu i granici sa Njemačkom.

U borbi protiv poplava, spasilačkim akcijama i otklanjanju šteta pomaže i 1.300 vojnika češke vojske.

Dunav prijeti Beču

Zbog naglog porasta vodostaja Dunava u okolini austrijskog glavnog grada stanovništvo je pozvano na evakuaciju.

Dosada su poginule najmanje dvije osobe, a nekoliko ih je nestalo.

Austrijske vlasti su u nedjelju naveče zbog nabujalog Dunava pozvale građane u okolini glavnog grada Beča da što prije napuste svoje domove.

Poziv se odnosi na stanovništvo Klosterneuburga i Kritcendorfa, koji se nalaze uzvodno od Beča.

Prema informacijama austrijskih medija, tokom sljedeća dva dana vodostaj Dunava bi ondje trebao skočiti za oko metar i po.

Da je situacija zaista dramatična, svjedoči i često spominjanje izraza “stogodišnja poplava”, koji se koristi pri opisu naglog rasta vodostaja Dunava i njegovih pritoka širom srednje Evrope.

U proteklih nekoliko dana u bujicama su život izgubile najmanje dvije osobe, a više ih je nestalo.

Jedan radnik koji je radio na raščišćavanju poginuo je u odronu zemlje u gradu Sent Johanu u blizini Salcburga, izvijestila je agencija APA, dok su u salcburškoj pokrajini, pogođenoj bujicama blata i vode, dvije osobe nestale.

Na nekim mjestima je u samo nekoliko dana palo kiše koliko padne u vremenu od dva mjeseca.

Nevremenom, koje je na nekim područjima izazvalo i najgore poplave od 2002. godine, teško su pogođene i savezne države Gornja Austrija, Tirol i Štajerska.

Obilnim kišama i poplavama pogođeni su i istok i jug Njemačke, gdje je prekinut željeznički saobraćaj prema Austriji. Dvije osobe su nestale u Rojtlingenu na jugozapadu zemlje, saopštila je policija Baden-Virtemberga.

Pripadnici češke vojske su oko istorijskog središta Praga podigli metalne prepreke i postavili vreće s pijeskom da bi ga zaštitili od poplava nakon što su višednevne kiše dovele do porasta nivoa rijeka i primorale stanovništvo nekih nizinskih područja na evakuaciju.

Kako je voda rijeke Vltave prodrla u dijelove starog dijela grada, praške su vlasti ograničile javni prevoz i zatvorile stanice podzemne željeznice.

- Zbog sadašnjeg stanja proglasio sam stanje uzbune za područje glavnog grada - rekao je gradonačelnik Tomas Hudeček.

U poplavama u Češkoj jedna je osoba poginula, a više ih se vodi kao nestale.

Jake kiše izazvale su brojne odrone širom Austrije, a posebno u pokrajini Tirol, gdje je jedan teretni voz, tokom noći, iskliznuo iz šina.

Prema saopštenju policije voz, koji je prevozio kamione, skliznuo je sa šina zbog odrona.

Mašinovođa nije uspio na vrijeme da zaustavi voz kako bi izbjegao sudar sa zemljanom i kamenom masom koja se našla na šinama.

Oba prednja trapa voza su iskliznula sa šina, zbog čega je privremeno na „Brenerštreke” prekinut saobraćaj.

Inače je austrijska željeznica u nedjelju zbog poplava i odrona obustavila međunarodni saobraćaj ka sjeveru i zapadu Evrope.
 

 

Pratite nas na našoj Facebook i Instagram stranici i X nalogu.