Ko je bio Hening kojeg je ubila ID

London - Alan Hening, zatočeni Britanac kojem su ekstremisti Islamske države odrubili glavu, taksista iz Salforda, bio je u svojoj četvrtoj humanitarnoj misiji u Siriji.

Tom prilikom on je otet, piše danas britanski BBC.

Brat Heningove supruge, Kolin Livesi opisao je ubijenog Heninga kao "sjajnu osobu" i ocjenio je da je vlada premijera Dejvida Kamerona trebalo da učini više kako bi ga oslobodila.

Hening (47) je otet iz konvoja, u decembru 2013, u prvom satu tek što je stigao u Siriju.

Bio je otac dvoje djece, i vrlo tehnički umješan, zbog čega su ga prijatelji zvali "gedžet". Svi su ga znali kao taksistu, a bio je i poznat po velikom srcu, zbog kojeg je prije otmice bio u tri humanitarne misije.

Prije no što je otišao u Siriju četvrti put, Hening je rekao BBC-ju da on nije musliman, ali da mu je posjeta jednom izbjegličkom kampu izmjenila život i da zbog toga ima potrebu da se vraća.

Njegova supruga je koliko prošle sedmice molila da Hening bude oslobođen, tvrdeći da je on nevin. Prema njenim rječima, Heningova porodica je i dalje pokušavala da komunicira sa otmičarima, pa je čak dobila i audio poruku u kojoj se on čuje kako moli za život.

Generalni sekretar Muslimanskog savjeta Britanije Sudža Šafi napisao je na Tviteru da je Alan Hening "pomagao muslimanima" i da je njegovo ubistvo "besprizoran i uvredljiv čin".

Heningov prijatelj Madžid Frimen, koji je bio sa Heningom u konvoju iz kojeg je on otet, takođe je optužio vladu Dejvida Kamerona da nije adekvatno reagovala i ocjenio da je Hening bio prepušten sami sebi.

"Oni (Islamska država) daju taocima nedjelju dana prije no što naprave video snimak, a onda ih ubiju. U Alanovom slučaju, to se oteglo na tri sedmice... što pokazuje da su oni možda razmatrali mogućnost da ga oslobode", rekao je Frimen.

Hening je četvrti zapadnjak kojeg su ekstremisti Islamske države likvidirali odsecanjem glave - pred kamerama. Motiv je uvijek isti: maskirani dželat poručuje ko je slijedeća žrtva i ubiju taoca. Prije Heninga, likvidirana su dva američka novinara i jedan humanitarni radnik iz Britanije.

Pratite nas na našoj Facebook i Instagram stranici i X nalogu.