Boko haram ubio stotine ljudi

Majduguri - Stotine ljudi ubijeno je u sjeveroistočnom dijelu Nigerije, u novom napadu pripadnika islamističke organizacije Boko haram.

Novi napad dogodio se u ponedeljak u mjestu Gambor Ngala, u državi Borno, uporištu Boko harama, gdje je 14. aprila iz jedne srednje škole kidnapovano 276 djevojčica.

Prema riječima lokalnog senatora Ahmeda Zane, ubijeno je 300 ljudi, a očevici tvrde da su izbrojali više od 100 ubijenih osoba.

Napadači su zapalili pijacu, zgradu carinske službe, policijsku stanicu i gotovo sve prodavnice

Zbog otmice u aprilu, nigerijska policija danas je ponudila nagradu od 300.000 dolara onima koji pomognu u nalaženju otetih djevojčica, a francuski ministar spoljnih poslova Loran Fabijus izjavio da je Nigeriji u tom cilju na raspolaganju i francuska ekipa stručnjaka.

Američki predsjednik Barak Obama je, komentarišući otmicu, rekao da je to situacija od koje se "slama srce" i izrazio nadu da će poslije ovog strašnog događaja međunarodna zajednica učiniti nešto protiv organizacije koja je počinila strašan zločin.

Boko haram na lokalnom Hauza jeziku znači "Zapadno obrazovanje je grijeh", a grupa koja nosi to ime organizovala je posljednjih godina niz napada u sjevernoj Nigeriji, u kojima je stradalo oko 1.500 ljudi.

Pratite nas na našoj Facebook i Instagram stranici i X nalogu.